Өмнөговь аймгийн автотээврийн салбарын 100 жилийн ойн баярын хүрээнд ШУТИС-ийн Өмнөговь аймаг дахь Технологийн дээд сургууль болон “Монголын төмөр зам” ТӨХК хамтын ажиллагааны гэрээ байгууллаа.

ШУТИС-ийн харьяа Өмнөговь аймаг дахь Технологийн дээд сургуулийн захирал Б.Баяржавхлан, “Монголын төмөр зам” ТӨХК-ийн гүйцэтгэх захирал О.Батчулуун нар хамтын ажиллагааны гэрээнд гарын үсэг зурж, цаашдын хамтын ажиллагааны чиглэл, хүрээг тодорхойллоо.

Талууд төмөр замын чиглэлээр хамтарсан судалгаа, эрдэм шинжилгээний ажил гүйцэтгэх, мөн тус чиглэлээр тусгайлан анги, танхим нээж сургалт явуулах талаар харилцан тохиролцсон юм.

Энэхүү хамтын ажиллагаа нь бүс нутгийн үйлдвэрлэл, тээврийн хөгжлийн салбарт мэргэжлийн боловсон хүчин бэлтгэх, шинжлэх ухаан, судалгаанд суурилсан хамтын ажиллагааг өргөжүүлэхэд чухал ач холбогдолтой юм.